صحبت پور۔14ستمبر (اے پی پی):وزیراعظم محمد شہباز شریف سیلاب توں متاثرہ علاقے صحبت پوراچ امدادی کماں کوں مزید تکھا کرݨ دی ہدایت کریندے ہوئیں آکھیے جو متاثرہ علاقیں تں پاݨی کڈھݨ دا کم تکھا کیتا ونڄے ، متاثرہ علاقیں اچ پیوݨ دا پاݨی وختی پجیسوں ، سیلاب تے سیاست نہ کریسوں ، وزیراعظم بلوچستان دے سیلاب توں متاثرہ علاقے صحبت پور دا دورہ کیتا جتھاں انہاں کوں سیلاب دیاں تباہ کاریاں ، متاثرین دی امداد تے تباہ شدہ انفراسٹرکچردی بحالی کیتے جاری کوششاں بارے ݙسایا ڳیا ۔ وزیراعظم کوں ݙسایا ڳیا جو صحبت پوربلوچستان اچ سیلاب پاروں ساریں توں ودھ متاثر تھئے اتھاں ضیان دا مشترکہ سروے وختی مکمل کرڳھدا ویسی ،متاثرہ خانداناں کوں 25ہزار روپے فی خاندان بے نظیرانکم سپورٹ پروگرام دے تحت ݙتے ویندے پئن ، ہݨ تئیں ھک لکھ 66ہزار خانداناں کوں اے رقم ݙتی ڳئی اے ، متاثرین کوں ݙو لکھ50ہزار مچھر داݨیاں ݙتیاں ڳئن جݙاں جو ڈھائی لکھ مزید ݙیسوں ایں توں انڄ خیمے ݙیوݨ دا کم وی جاری اے ۔ وزیراعظم کوں ݙسایا ڳیا جو ایں علاقے اچ 122 کیمپ بݨائے ڳئن ،میڈیکل کیمپس اچ 4لکھ توں ودھ مریضاں کوں علاج دیاں سہولتاں ݙتیاں ڳئن ، پینا ڈول اتے ملیریا دیاں دوائیں موجود ہن اتھاں نانگ دے چک پاوݨ توں ݙو اموات تھئن تاں جو ایندے تے قابو پا ڳھدا ڳئے ، حاملہ خواتین دی رجسٹریشن جاری اے، میڈیکل کیمپ اچ گائنا کالوجسٹ سودھا ٻیا متعلقہ عملہ موجود اے، مقامی ایم پی اے وزیراعظم دا خیرمقدم کریندے ہوئیں آکھیے جو اتھاں لوکاں دے گھر تے زراعت تباہ تھی چکی اے ،شہر توں پاݨی کڈھݨ دا انتظام کیتا ونڄے ۔
.jpg)