اسلام آباد۔13ستمبر (اے پی پی) وزیردفاع خواجہ محمدآصف آکھیا جو نویں شروعات کیتے ماضی دے رویاں اتے واقعیاں تے پشیمانی کرݨ ضروری اے۔ ہاؤس کمیٹی کہیں سیاسی جماعت دے تحفظات دے ازالے اتے بیانیہ کیتے نئی بلکہ ایوان دے تقدس اتے ہاؤس دا بیانیہ مضبوط ٻݨاوݨ کیتے ٻݨائی ڳئی اے۔ جمعے کوں قومی اسمبلی اچ ڳالھ مہاڑ کریندیں ہوئیں وزیردفاع آکھیا جو بلاول بھٹوزرداری دی چنڳی تجویز تے سپیکر کمیٹی ٻݨا ݙتی اے، اے کمیٹی ایں کیتے ٻݨائی ڳئی اے جو ہاؤس کوں مناسب طریقے نال چلایا ونڄے اتے ایندے تقدس کوں برقرار رکھیا ونڄے۔ وزیردفاع آکھیا جو ݙوݙینھ پہلے تھیوݨ آلے واقعے تے ساریاں احتجاج کیتے اتے پی ٹی آئی نال یکجہتی کیتی اے۔ کہیں پارلیمان تے حملے دی حمایت نی کیتی پر اتفاق رائے دی بعد کمیٹی دے اجلاس اچ جو تھیے اوں نال او روح متاثر تھیسی جئیں کیتے کمیٹی ٻݨائی ڳئی اے۔ وزیردفاع آکھیا جو انہاں کل کمیٹی دے اجلاس اچ وی احتجاج کیتے۔ میں کمیٹی دا رکن نہ ٻݨݨ چاہنداں میں آپݨی پارٹی کوں آکھیے جو کہیں بئے کوں رکن ٻݨاؤ، اے کمیٹی آپݨے بیانیہ نئی بلکہ ہاؤس دے بیانیہ اتے ہاؤس دے تقدس کیتے ٻݨائی ڳئی اے۔ انہاں آکھیا جو گنڈاپور ہک دھی اتے ماں کیتے جیڑھے الفاط استعمال کیتن کیا کہیں ایندی مذمت کیتی اے۔ انہاں آکھیا جو پی ڈی ایم سودھے ہݨ تئیں ݙو سال تھی ڳئن اساں نیب کوں کہیں دے خلاف استعمال کیتے۔ ماضی اچ جینویں نیب کوں استعمال کیتا ڳئے کیا کہیں ایندی مذمت کیتی اے۔ اپوزیشن احتجاج ضرور کرے پر ماضی تے وی نظرپاوے۔ انہاں آکھیا جو 2013 توں 2018 تئیں ایں ہاؤس دے احاطے تے قبضہ تھیا ہئی۔ ٹی وی ہیڈ کوارٹر تے حملہ تھیے۔ انہاں آکھیا جو عدم اعتماد توں 20 منٹ پہلے 22 بل پاس تھیے اتے بعد اچ اسمبلی تحلیل کر ݙتی ڳئی۔ ہݨ اساکوں قانون اتے قاعدہ سکھایا ویندا پئے۔ سیاست اچ چنڳی روایات کوں قائم کرݨا چاہیدے۔ اساں اپوزیشن ارکان دی گرفتاریاں تے تنقید کیتی اے پر انہاں دے دور اچ اساکوں سپیکر تئیں رسائی کائنا ہئی۔
