گوا۔5مئی(اے پی پی):وزیر خارجہ بلاول بھٹو زرداری آکھیے پاکستان سانجھے اعتماد، مساوات، ثقافتی تنوع دے احترام تے شنگھائی تعاون تنظیم دی اصل روح اچ موجود مشترکہ ترقی دے حصول دے اصولاں تے پختہ یقین رکھیندے تے او انہاں تے پوری طرح عمل کریندا پئے ، مشترکہ ترقی کیتے علاقائی اتے اقتصادی رابطے ضروری ہن ، پاکستان شنگھائی تعاون تنظیم کوں اہم علاقائی پلیٹ فارم سمجھدے ، مشترکہ ترقی دا اصول علاقائی، اقتصادی رابطے تے تعاون پاکستان دے وژن نال ہم آہنگ اے۔ وزیر خارجہ اے ڳالھ بھارت دے شہر گوا اچ شنگھائی تعاون تنظیم (ایس سی او) دے وزراءخارجہ کونسل دے اجلاس توں خطاب کریندے ہوئیں آکھئن ۔ انہاں آکھیے ایس سی او دے اجلاس اچ پاکستان دی نمائندگی میں کیتے اعزاز دی ڳالھ اے ، مشترکہ اقتصادی وژن اڳوں ودھاوݨ کیتے اجتماعی رابطے اچ سرمایہ کاری ضروری اے، سی پیک وسط ایشیائی ریاستاں کوں راہداری تجارت کیتے بہترین موقع ݙیندے ۔ وزیر خارجہ آکھیے ، پاکستان دہشتگردی مکاوݨ دیاں کوششاں دا حصہ بݨݨ کیتے پُرعزم اے، افغانستان دی صورتحال نویں چیلنجز دے نال نال مواقع وی پیش کریندی اے ۔ بلاول بھٹو زرداری پاکستان دے ایں مطالبے کوں دہرائے جو بین الاقوامی برادری عبوری افغان حکومت دے نال بامعنی ڳالھ مہاڑ کرے تاں جو او واقعات کوں بہتر طریقے نال سمجھ سڳن ۔ انہاں آکھیے افغانستان وݙیاں طاقتاں کیتے کھیݙ دا میدا بݨیا رہیے ، اساکوں افغانستان بارے ماضی دی غلطیاں کوں نی دہراوݨا چاہیدا ۔ بین الاقوامی برادری کوں افغان حکام تے سیاسی شمولیت دے عالمی طور تے قبول شدہ اصولاں کوں اپناوݨ تے چھوہریں دی تعلیم دے حق سودھے سارے افغاناں دے حقوق دا احترام کرݨ تے زور ݙیوݨ جاری رکھݨا چاہیدے، ایندے نال نال عالمی برادری کوں وی افغانستان، خطے اتے پوری دنیا دی سلامتی کیتے انسداد دہشت گردی دی صلاحیت ودھاوݨ اچ مدد کرݨی چاہیدی اے ۔ انہاں آکھیے اے ڳالھ تشویشناک اے جو بین الاقوامی برادری دے برعکس افغانستان اچ دہشت گرد گروپ آپت اچ زیادہ تعاون کریندے پئن ، پاکستان عبوری افغان حکام توں مطالبہ کریندے جو او دہشت گردی کیتے افغان سرزمین دے استعمال دی اجازت نہ ݙیوݨ کیتے آپݨے وعدیں کوں برقرار رکھن۔انہاں بین الاقوامی برادری توں مطالبہ کیتے جو او انہاں سیکورٹی خدشات کوں دور کرݨ کیتے کم کرے تاں جو نہ صرف افغانستان بلکہ پورے خطے دی حقیقی صلاحیتاں توں فیدہ چاتا ونڄ سڳے ۔ ھک پرامن اتے مستحکم افغانستان نہ صرف علاقائی انضمام اتے اقتصادی تعاون بلکہ عالمی امن اتے استحکام دی کلید اے، اساکوں یقین اے جو ایس سی او افغانستان رابطہ گروپ افغانستان دے نال عملی تعاون کوں مربوط کرݨ اچ کردار ادا کرسڳدے ۔ وزیرخارجہ آکھیے ایس سی او دا قیام پورے یوریشیا اچ سیکورٹی کوں یقینی بݨاوݨ سانڳے کیتا ڳیا ہئی ، اے تنظیم خودمختاری، علاقائی سالمیت اتے لوکاں دے حق خود ارادیت دے اقوام متحدہ دے اصولاں تے سختی نال عمل پیرا اے۔ انہاں آکھیے پاکستان کثیرالجہتی عمل کیتے پرعزم اے اتے او اقوام دے درمیان دوستانہ تعلقات قائم کرݨ تے پراݨے بین الاقوامی جھیڑیں دے پرامن حل دی حمایت کیتے اقوام متحدہ سودھے سارے بین الاقوامی فورمز تے قائدانہ کردار ادا کریندا رہندے ۔ وزیر خارجہ بلاول بھٹو زرداری سعودی عرب اتے ایران دے درمیان اختلافات مکاوݨ کیتے چین دے اڄوکے کردار کوں قابل ستائش قرار ݙیندے ہوئیں آکھیے ݙوہیں ملک ایس سی او نال وی وابستہ ہن۔ انہاں آکھیے جݙاں وݙیاں طاقتاں امن ساز دا کردار ادا کریندن تاں اساں آپݨے لوکاں کیتے وسیع تر تعاون، علاقائی یکجہتی اتے اقتصادی مواقع دی راہ ہموار کریندے ہوئیں امن دی صلاحیت کوں کھول سڳدوں ۔ انہاں آکھیے اساکوں شنگھائی تعاون تنظیم اچ انہاں عالمی طور تے منیے ڳئے اصولاں دے احترام کوں یقینی بݨاوݨا چاہیدے ۔ وزیر خارجہ آکھیے بین الاقوامی قانون اتے سلامتی کونسل دی قرارداداں دی خلاف ورزی کریندے ہوئیں ریاستاں دے یکطرفہ اتے غیر قانونی اقدامات شنگھائی تعاون تنظیم دے مقاصد دے خلاف ہن، اساکوں آپݨے وعدیں کوں نبھاوݨاں چاہیدے تے آپݨے لوکاں کیتے ھک نویں مستقبل دی منصوبہ بندی کرݨ اچ غیر مبہم رہݨ دی لوڑھ اے ۔ انہاں ایس سی او دے اہداف اتے مقاصد کیتے پاکستان دی غیر متزلزل حمایت اتے عزم دا اعادہ کریندے ہوئیں آکھیے ایس سی او دنیا دی 40 فیصد توں ودھ آبادی اتے جی ڈی پی دی تقریباً ھک چوتھائی دی نمائندگی کریندے ، معیشتاں اچ رابطے دی کمی علاقائی تجارت تے سرمایہ کاری دی راہ اچ وݙی رکاوٹ اے ، ایس سی او مستقبل دی نمائندگی کریندے ، جے اساں اینکوں حاصل کرݨ کیتے رل تے کم سڳوں ، اے اساں ساریں کیتے ھک شاندار تے خوشحال مستقبل تھی سڳدے ۔
